Bitartekaritzak garrantzi berezia hartzen du komunitatearen eremuan, gatazkan dauden alderdiek bizikidetza-ingurune bera partekatzen baitute. Gatazkan dauden alderdiek hurbileko harremana izaten jarraituko dute, eta, beraz, askoz balio handiagoa hartzen du elkarren artean akordioak lortzea ahalbidetuko duten sistema alternatiboak erabiltzeak.

Bitartekaritza komunitarioak printzipio hauek partekatzen ditu bitartekaritzarekin: borondatezkotasuna, inpartzialtasuna, neutraltasuna, fede ona eta konfidentzialtasuna. Bitartekaritza komunitarioan garrantzi berezia hartzen du alderdiek ezkutuan edo bigarren maila batean dituzten interesen bilaketak. Interes horiek behar-beharrezkoak direlako beren jarrerak ulertzeko, haien arteko enpatia sustatzeko, jarrerak hurbiltzeko eta adostasuna ahalbidetzeko.

Bitartekaritza komunitarioak, gatazka aktiboak konpontzeaz gain, gatazka horiek prebenitu eta bizikidetzarako eta herritarren partaidetzarako ideiak sustatzen ditu, komunitatean harreman kooperatiboak sustatuz. Komunitate-bitartekaritzaren helburua ere bada, halaber, komunitatea kontzientziatzea sortzea eta etorkizunean beren gatazkak konpontzeko erabil daitezkeen tresnak eskaintzea.

Komunitate-bitartekaritzaren helbururik handinahiena komunitatea bera indartzea eta bakerako azpiegiturak sortzea da, azken finean autonomiaz funtzionatuko duten sare sozialak eraikiz, sinergiak sortuz eta autosufiziente bihurtuz. Hori lortzeko, ezinbestekoak dira udal zerbitzu ezberdinen arteko lankidetza eta elkarlana, baita diziplina anitzeko bitartekaritza talde sendo bat izatea, elkarbizitza garatzen den testuinguru kultural eta soziala kontuan hartuta, sor daitezkeen gatazkan esku hartzeko gai dena.